ვებ პორტალი მომზადდა საქართველოს კულტურისა და სპორტისა სამინისტროს ხელშეწყობით განხორციელებული პროექტის - „ქართველი ქალი კომპოზიტორების ვებ-პორტალი“-ს ფარგლებში და ემსახურება იმ ქართველი კომპოზიტორი ქალების პოპულარიზაციას, რომელთა მოღვაწეობა დაკავშირებულია პროფესიულ - აკადემიურ მუსიკასთან.

კომპოზიტორ ქალთა შესახებ ინფორმაცია მწირი და რთულად მოსაპოვებელია. ამიტომაც, კვლევისას მოძიებული თითქოსდა მცირე დეტალიც კი განსაკუთრებულ მნიშვნელობას იძენს.

პროექტის განხორციელებას ხელს უწყობს მომიჯნავე სფეროში არსებული მასალა (ფოტო მატიანე, თეატრის ისტორია, დოკ. კინო,  რადიო და ტელე-არქივი, პრესა და სხვ.).

ქართველ კომპოზიტორ ქალთა ღვაწლი, სამწუხაროდ, ნაკლებად ცნობილია. დანანებით უნდა აღინიშნოს, რომ უმეტესობას ჩრდილში უწევდათ მოღვაწეობა. ხშირად მათ სახელებს არც კი ახსენებდნენ და მუსიკალური სამყაროსთვისაც უცნობად რჩებოდნენ.

პროექტის მიზნის განხორციელებაში მონაწილეობენ  საორგანიზაციო და სარედაქციო ჯგუფის წევრები: ლელა მაქარაშვილი (კომპოზიტორი, პროექტის იდეის ავტორი), მერი შეყილაძე (მუსიკოლოგი), მარიამ ჩიჯავაძე (მუსიკოლოგი) და თამარ წულუკიძე (მუსიკოლოგი). მეორე ეტაპზე ჯგუფს შეუერთდნენ მკვლევრები: რუსუდან თაყაიშვილი (მუსიკოლოგი) და ირაკლი არეშიძე (კომპოზიტორი, მუსიკოლოგი).

პროექტის რეგლამენტი გულისხმობს ეტაპობრივად ათ-ათი კომპოზიტორის შესახებ მასალის დამუშავებას და მონაცემების განთავსებას ვებ-პორტალზე - სახელწოდებით „georgianwomencomposers.ge“.

პროექტის პირველი ეტაპი 2022 წელს (ივლისი-ნოემბრი) განხორციელდა. წარმოდგენილ იქნა ყოველ ათწლეულში დაბადებული თითო  ერთეულის მონაცემები.

პირველი ათეული:

1. ბარბარე ამირეჯიბი 1873.08.24. - 1939.04.03. 
2. თამარ ვახვახიშვილი 1891.10.14. - 1955.09.18.
3. თამარ შავერზაშვილი 1893.12.23. - 1976.10.31.
4. დაგმარა სლიანოვა-მიზანდარი 1910.12.28. - 1983.11.12.
5. ლილი იაშვილი 1920.05.10. - 1983.12.30.
6. ნინო ზაბუკიძე 1935.09.24. - 2018.12.14.
7. ელისაბედ (ლილი) შავერზაშვილი 1940.10.28. - 2018.03.20.
8. რუსუდან ხორავა 1954.03.06.
9. თამარ ვაშაკიძე 1960.02.09.
10. ეკა ჭაბაშვილი 1971.01.12.

პროექტის მეორე ეტაპზე, რომელიც მიმდინარეობდა 2023 წლის აპრილ-ივლისის პერიოდში, მომზადდა და ვებ პორტალზე განთავსდა მეორე ათეულის მონაცემები.

მეორე ათეული:

1. ოლღა ბარამიშვილი 1907.11.30. - 1956.09.29.
2. მერი დავითაშვილი 1924.03.13. - 2014.02.17.
3. დალი ჩხეიძე 1927.12.26. - 1993.12.27.
4. ნუნუ გაბუნია 1941.07.18.
5. ნანული ბრეგვაძე 1945.06.03.
6. დინარა ჯანდიერი 1946.08.15.
7. ნანული (ნანა) კობალაძე 1954.01.03.
8. ნინო (ნანა) გაბაშვილი 1961.02.22.
9. მაია (მაკა) ვირსალაძე 1971.05.23.
10. ანა ქასრაშვილი 1986.11.23.

პროექტის მესამე ეტაპი განხორციელდა  2024 წლის მარტი-მაისის პერიოდში, მომზადდა და ვებ პორტალზე განთავსდა მესამე ათეულის მონაცემები.

მესამე ათეული:

1. ვალენტინა ჯაიანი 1912.05.21. - 1998.06.15.
2. ელეონორა (ნორა) ექსანიშვილი 1919.02.11. - 2003.01.01.
3. ლეილა ხაფავა 1924.06.27. - 2016.10.13.
4. დარეჯან ოქრომჭედლიშვილი 1942.01.25. - 2018.12.27.
5. მარინა ადამია 1957.02.25.
6. მანანა ალფაიძე 1957.03.04.
7. ნინო ჯანჯღავა 1964.07.29.
8. ლელა მაქარაშვილი 1968.01.03.
9. რუსუდან მეიფარიანი 1975.10.12.
10. თამარ ფუტკარაძე-ლაშხი 1989.02.08.

აგრეთვე, ეტაპობრივად მიმდინარეობდა ვებ პორტალის მონაცემთა ბაზის გაფართოება და ადაპტირება, კომპოზიტორ ქალთა მოღვაწეობის მასშტაბების გათვალისწინებით. ამ ეტაპზე  ვებ-პორტალზე წარმოდგენილია 30 კომპოზიტორი ქალის მონაცემები, რომელიც თვალსაჩინო და დაწვრილებით ინფორმაციას იძლევა თითოეული კომპოზიტორის მოღვაწეობაზე.  

1. ძირითადი მონაცემები (10 ველი)
2. ბიოგრაფია და შემოქმედებითი გზა
3. ნაწარმოებების სრული ნუსხა (22 ველი)
4. ნოტები და მოსასმენი (წარმოდგენილია თითოეული კომპოზიტორის შემოქმედებიდან რჩეული ნაწარმოებების სანოტო ციფრული ვერსია PDF [35 გვ.-მდე ოდენობით] და გასაჟღერებელი მასალა MP3 ფორმატის სახით, მონაცემები - 11 ველი)
5. შემოქმედებითი, საგანმანათლებლო და საზოგადო აქტივობა (8 ველი)
6. პუბლიკაცია, გამოსვლა (7 ველი)
7. ჯილდოები (5 ველი)
8. ლიტერატურა (6 ველი)
9. ბმულები (7 ველი)
10. გალერეა (6 ველი)

პროექტზე მომუშავეთა ჯგუფი მუდმივ სამუშაო პროცესში არის ჩართული. პოპულარიზაციის მიზნით ფართო საზოგადოების ინფორმირებას ახდენს მედია საშუალებებით. აქვე აღვნიშნავთ, პროექტის განმხორციელებელთა მიერ ყველა ეტაპზე ეწყობა ვებ-პორტალის საპრეზენტაციო ღონისძიება, მნიშვნელოვანი ადგილი ეთმობა მუსიკალურ ნაწილს - ნაწარმოებთა ცოცხალ შესრულებას. უმეტესწილად, საკონცერტო რეპერტუარი დაკომპლექტებულია ნაწარმოებებით, რომელთა უმეტესობა ხელნაწერის სახით არსებობდა, პროექტის ფარგლებში იქნა მოძიებული, აღმოჩენილი და ციფრული სანოტო ვერსიის შექმნის საფუძველზე პირველად, ან მრავალი წლის შემდეგ აჟღერდა.

აღვნიშნავთ, რომ ვებ-პორტალზე წარმოდგენილი მასალა საგანმანათლებლო სფეროს ეხმიანება, აგრეთვე მუსიკის სახელმძღვანელოებისთვის  დამხმარე წყაროს  ფუნქციას ითავსებს. ციფრული სანოტო ნიმუშები კი შექმნის ნაწარმოებთა საკონცერტო ესტრადაზე შესრულების წინაპირობას და სიცოცხლეს მიანიჭებს ავტორთა შემოქმედებას.

ვებ პორტალის მონაცემები გაზრდის ინტერესს ქართული კულტურის მნიშვნელოვანი სფეროს, ქართველი კომპოზიტორი ქალების და მათი შემოქმედების მიმართ.

პორტალის სტუმრებს ვუსურვებთ სასიამოვნო და სასარგებლო მოგზაურობას ვებ სივრცეში და მოვუწოდებთ საორგანიზაციო ჯგუფთან შეთანხმებით, ჩაერთონ დამატებითი მასალის მოძიებაში, ამით ხელი შეუწყონ საიტის მუდმივ განახლებას.

პროექტის სარედაქციო ჯგუფი

2024.06.01.